LA SFIDA NAPOLETANA ALLA BIOLOGIA MOLECOLARE

Gambizzato, 2000


Io vulesse 'a spiegazione:
a che serve chesta Scienza
si nun dà 'a dimostrazione
d' 'e misteri d' 'a cuscienza ?

Si nun sape dà 'a risposta
p' 'a domanda cchiù banale,
che ognuno già s' è posta
comme quiz universale ?

Ma l' Ammore, comm' è fatto ?
Chi 'o produce ? Che robb' è ?
S' adda potenzià l'olfatto
o è 'na cosa che non c'è ?

Fosse mai 'na linfochina ?
È 'na ghiandola, 'n ormone ?
Fosse.. 'n ata encefalina
o 'n' ato gas int' 'o pulmone ?

Addò nasce ? Int' 'o cerviello ?
Certo 'a sotto d' 'a corteccia !
Si arragiona troppo, chillo,
nun 'a mena chella freccia.

Forse,. 'o core è 'o motore,
che produce st' energia,
senza manco 'nu rummore
e senza fa' 'n' economia.

Nun è certo l'intestino
che tenimmo dint' 'a panza,
poco nobile è 'o destino
poca, pure, è l'eleganza.

Pure 'o fegato se dice
che produce tanto umore,
ma l' Ammore è assai 'nfelice
si d' 'a bile.ten' 'o sapore.

Forse è 'o rene ? o 'a curatella ?
'O segreto addò è che sta ?
Dint' 'a milza ? manco chella !
...Stesse dint' 'o DNA ?

Tutto chello che pensate
s' adda sempe dimostrà;
sempe nasce 'nu scienziato
cu stu genio 'e ce pruvà.

Biologia molecolare,
nun te mettere appaura,
c' 'o quesito universale
nun può fa' brutta figura.

Ce vulesse 'nu studioso
che tenesse 'a fantasia,
cu 'nu spirito curioso
p' arrivà.oltre 'a poesia.