O Ministro 'e Sanità

Gambizzato

'O Ministro c' 'a gunnella
tene proprio 'a capa tosta,
nun ce tene a esse' bella
l' importante è che se 'mposta*.

Già cuntrolla l' assemblea
comme fosse 'o domatore,
porta 'nnanze l' Odissea
d' 'a riforma co' ll' ardore.

Fa l' esproprio proletario
a 'o duttore ospedaliero,
che s' è scritto int' 'o diario
chisto tuorto giornaliero:

nun se chiamma cchiù Primario,
comme 'o conosceva 'a gente
e se sente 'nu falsario
c' 'a ricetta 'e "Dirigente" ; **

e poi mò se stesse accorto,
s' allisciasse 'o Direttore,
ca si 'o fatto le va stuorto
pò fini' a fa' 'o pulitore.

'O Ministro 'o tene in odio
'a quann' era peccerella:
" 'A ricetta amara 'e iodio
fu prescritto proprio a Chella ? "

"Nu sciroppo sulamente
pe' te fa' 'a rivoluzione ?
Nun ce credo, certamente,
ce sarrà 'na delusione."





"Nu duttore giuvinotto
l'ha sedotta e abbandonata ?
si accussì… è ghiuto 'o fatto
certo è..…….. giustificata".

Ma nun credo, sta' sicura!
È 'na donna troppo onesta,
'a coscienza soja è pura,
'a ragione nun è chesta.

Chella 'a colpa è d' 'o concetto
che 'a nonna ce 'a 'nculcato,
che si tu ausculte 'o pietto
certamente…… fai peccato.

Si 'sta visita,…… però,
'a fai ccà, dint' 'o spidale,
(è spugliata sempe, o no ?)
nun ce sta cchiù niente 'e male.

Tu addeviente santariello
si 'stu povero malato
passa primme p' 'o spurtiello,
che ce 'mporta si è affollato ? ***

Che ce 'mporta si ''o duttore
perde tutta 'a libertà
'e curarlo a tutte l'ore,
calmo e cu 'e commodità ?

Si addeventa nu 'mpiegato
perde subbeto 'a coscienza,
e quann', po', tiempo è passato,
si se scorda pure 'a scienza ?

Chistu semplice concetto
nun se riesce a fa' capi';
essa insiste c' 'o difetto,
'ncapunisce: "Adda i' accussì !"


"Ccà ce mette 'a cattiveria,
è 'o puntiglio ch' 'a sustene,
certo è…. persona seria:
ma equilibrio ? poco ne tene ! ".

Ce vulesse 'a cumpagnia
ch' 'a facesse arraggiuna'
e 'na passiata int' a cursia
pe' capi' comm' è che va.

Gambizzato, '99

*     assumere atteggiamento da guascone
**     intestazione del nuovo ricettario ristampato
*** prenotazione telefonica (e chi ti risponde ?), viaggio per raggiungere l'ospedale, fila al CUP, sportellista esaurito e fuso, sala d'attesa senza comfort, scarsa privacy, studio medico asettico se non squallido, medico non a suo agio in ambiente ambulatoriale non in stile con la sua filosofia di vita, senza segretaria, interrotto dalle chiamate dal reparto e dai familiari dei ricoverati, senza la consueta tranquillità di sentirsi a casa propria etc., etc..