LA RATIO DEGLI "INCONTRI"

Gambizzato, 2000

Si voglio fa' 'nu poco 'e aggiornamento,
chist' anno, aggio fatto già 'a pensata,
vado a senti' gli' "Incontri" a Benevento
addò .........ce scappa pure 'na risata.

A me me piace chell' atmosfera,
addò prevale sempe 'a colleganza
e può discutere, pure fino a sera,
senza tene' nisciuna sudditanza.

'Sta qualità sicuro tu l'appriezzi,
ma là se 'mpara n' ata cosa bona
che 'o Malato nun se cura a piezzi
pecchè intera è nata 'sta persona,

che tutta quanta add' esse' rispettata,
che ce vò sempe 'o senso d' a misura,
che l'equilibrio add' esse' conservato
tra tutte 'e forze ch' esistono in natura;

ch' 'o Miedeco se stesse sempe accorto,
che 'a Prufessione oggi è in salita,
ma, certamente, nun ce scappa 'o muorto,
si Isso resta 'nu "studente a vita".

Te 'mpare, là, che i libri nun so' tutto,
che conta assaje pure l'esperienza,
che quann' cride ch' ha' capito tutto,
nun basta mai si nun ce sta 'a cuscienza.;

si nun ce sta 'a fiducia int' 'o rapporto,
'a Medicina nun funziona mai,
'sta varca nun arriva mai in porto
e 'o Malato annaspa 'nmiezo 'e guai.

E quanto vale chella simpatia,
quann' 'o malato te sente comm' amico,
ce serve, sì, ........'a tecnologia
ma, spisso, è meglio 'o Duttore antico.

Nun bastano 'e carezze, ce vò 'a Scienza,
pe' fa' sana', si 'a malatia è vera,
ma quanta ce ne vò, pure 'e pacienza,
pe' cura' l'anima, che, spisso, se dispera.

'O corpo umano nun è 'nu robot,
nun basta l'uoglio dint' agli ingranaggi,
è 'n' illusione, che và 'e moda mò,
addò se campa c'analisi e cu 'e raggi.

Agli "Incontri" ce sta 'n' ata teoria,
se sforzano 'e cerca' d' 'a divulga',
mettennoce 'nu poco 'e fantasia
comme se fa .....dint' 'a pubblicità:

ce serve 'a Tac e pure 'a Risonanza,
ce serve 'a prova che dà l'evidenza,
ma nun 'o risuolve 'o male 'e panza
si ce manca 'o Miedeco ...che pensa;

che mette insieme ogni informazione,
che nun trascura manco 'nu sospetto,
che nun se scorda mai... 'a lezione
che 'a diagnosi se fa affianco 'o lietto.